1Pe 4 | ASO | STEP | Nemu' nene Kilisito' oko'nolo' mulumo geni gihidi'mine igi linginesi mulumo geni gihilizangumu' nene lutine gatine di amuzo mili di va'va' igisa minilo. Nene nanitekumu' ve. Ve ma oko'nolo' mulumo geni gehe nolive aza lihime daa' monovo nene mo hulosa noloseinako nemu' nene noluve.

1 Peter 4

Kilisito' Oko'nolo' Mulumo Geni Gihidi'mino Lazasi Gehelone Liisa Lihime Daa' Monovo Ato Ato' Nene Hulii O'moso'mi Lulolokovo' Igi Mili Nizavo Hililizani' Gamene Ilive Lo Petolo' Lo-ngimine' Gamazi

1 Nemu' nene Kilisito' oko'nolo' mulumo geni gihidi'mine igi linginesi mulumo geni gihilizangumu' nene lutine gatine di amuzo mili di va'va' igisa minilo. Nene nanitekumu' ve. Ve ma oko'nolo' mulumo geni gehe nolive aza lihime daa' monovo nene mo hulosa noloseinako nemu' nene noluve. 2 Ido' ne'mine ma ilizani' nene idise meloti' nene haza okodesi minevo' alevo' o'mo dizelone' gameneu' nene haza alevete lanite' gilaa' naani' monovo nene laza gohi amo asi O'moso'mi lulolokovo' ogo molo minelone lisa ne'mine ilizani' o neive. 3 Ee, gomu' lingine O'moso'mi evenele minamave heta ato' velite ngumo helaa' ine' monovo goloso igi mili'mi dizani' nene mo moda ve lo noluze. Gohi amilo. A'mine goloso monovo nene ado' ne'mine mana'mine monovo goloso longovozo hilami gopo iga', inite' goloso mamu' lutine otaa', nosolo' moni sipaki goloso iga', noso' nite' naba ni zohi' igi noso ni sipaki iga' ido' noso naa' pati di soto' iga' ido' soza o'moso nge'metaa' monovo goloso iga' ani' mamu' nene noluze. Mo hulilo. 4 Lingine a'mine heta ato' vesi nene a'mine monovo golosou' nene vili vivi' vivi' igi minani' ma'mine nene gohi amavo ingine ningi upuho' igi lengi' nene divi ledivi' igi lengemenga laa' nave. 5 Ne neiha a'mine engi' nene vetesi ha nonivesi hilavesi monovotemu' goni' o-ledo ize' molo-ledelesa do va'va' o neive ne'mo nene ne'mine angumu' nene lingine nanitekumu' ave lo goni' o-ngedo lihime ngemeleseive. 6 Nemu' nene mono' gamazi lamine' nene hilavetidasi vo heteline' ve. Ingine haza oko'inesi minani' gameneu' nene O'moso'mo evene' muki' o-ledaa' neine' ne'mino engikisi goni' o-ngedo lihime ngemavo hilani'za ingine sikalahu'inesi mini O'moso'mo minevo' minevo' oga' neidi'mine igi minivi' minivi' ilizangumu' ve losa a'mine mono' gamazi lamine' nene engitasi hulavo vo heteline' ve.

O'moso'mo Nasahili' O-ledo Lehize-lede Neine' Amuzo Nene Gele nGe Lo Mino Ogo Molo Oloningumu' Petolo' Line' Gamazi

7 Ido' inite' mata' muki' osu' liline' gamene nene mo avito' ogaze. Lingine nene O'mosola lilizado' lisihe' i minilizangumu' nene lutine gatine gopo amivo di vevesi minilo. 8 Lute ngemaa' monovolo' e'metilizave nete nene evenelite di goloso i-ngidilizani' lihime muki' nene di halekisavo' apasi-ngidilizani' nenako nemu' nene lingine igi mili ilizani' inite' mukikuti' ma dizo neine' nene lingine lutine ge neme ne geme li minilisa nene amuzo mili igi mili minilo. 9 Ido' evene' numudingu' alizangumu' nene lingine nulu nulunga li lihiteheka lami numudingu' numudingu' nene ne do lamine' o-gede ge do lamine' o-nede lisavo' minilo. 10 O'moso'mo lengi' nene nasahili' o-lengedo gono daa' amuzo ato ato' vai' nene lehize-lengede neize. A'mine lehize-lingidine' amuzolo' nene gizebo lamine' igi minilizangisi lingine hamo hamo' a'mine di nizani' amuzodunu' nene ge hize ele' o-nede ne hize ele' o-gede li minilo. 11 Ado' mono' lo-lengemelive neve nene O'mosolo' medelo mino ei' O'moso'mi gamazi'vevo' nene lo-lengemelive. Ido' nasahili' ogo hize ele' gono do-lengedelive neve nene O'moso'mo amuzo emaa' neine' votigilelo' nene do molo a'mine gono nene do-lengedelive. Ido' ne'mine ilizani' nene lingine Izesu' Kilisito' hize ele' o-lidivo laza olone' inite' mata' mukitoti' nene O'moso'mi gulive nene do naba o-delone lisa nene ne'mine ilizave. Ezela nene guvelesi ido' amuzo nesi nene mo minevo' minevo' ogovo' minelive. Mo ne'mino minilihoo.

Izesu Kilisitodo' Gi'mizi Nizavo Mulumo Geni Gihi-lingidilizangumu' Nene Upuho' Igi Olovo' Ami Longolize Izi Mini Monovo Lamine' I'mi Vi Mini O'mosolo' Lehete' I Minilizave Lo Petolo' Lo-ngimine' Gamazi

12 Lu'ne lengeme nouvoni' alevekizo, lutine do ningelesa lengemengu' molo ololi'mo longolaa' neine' ne'mino mulumo geni gihi-lingidilisa naavo lengi' soto' o-lengedelesa neingumu' nene lingine leli' soto' o-ledamilido' o neine' inite' atoli'mine ma soto' o-ledelesa neihe li upuho' amilo. 13 Asi Kilisito' mulumo geni gihine' ne'mine nene linginesi gihi nilizani' nenako nemu' nene lingine Kilisito' labana'vesi gohi soto' iline' gameneu' nene luteu' gulumo avile lisivo mino lolize naba izeloningumu' ve li longolize izi minilo. 14 Ido' lingine Kilisito' evenele lili' igi eze gulive di minangumu' lingilimaa' navo ma nene guvelesi neine' O'moso'mi Sikalahu' neve nene lengito' omo mino mine do viline' nenako nemu' nene lingine longolize izi minilizado' o neive. 15 Ido' lengikuti' linge ma mulumo gono gihi-lingidilizani' nene lingine evene' ma ngibili hililizahe ido' gumine damine ilizahe ido' monovo goloso atoli'mine ilizahe ido' evene' maliti initeku' gavakavato' monaa' ilizahe ilizadoti' mulumo gono lingimilizani' nene mo edamoloseize. A'ne'mine monovo nene mo amilo. 16 Ne neiha evene' ma aza Kilisiteni lolo' ogo minelingumu' mulumo geni inite' gihi-dilizani' nemu' nene ovozo helamo asi Kilisiteni gulive've miningumu' nene O'moso do naba o-do minelive. 17 Ne'mine mana'mine monovolo' e'meti minilizave lo meuko noluvoni' nene O'moso'mo eze evenele zuho gonito' lele'mize molo-ledeline' gamene mo alitingumu' nene noluve. Ido' ei' evenele lelitoti' api' ogo evene' lihime lengeme'mo viline' nene aizo, alinge' nela eze gamazi've laminekumu' gili ele'vole' amave goni' o-ngedo lihime ngemo do nadi' o-ngedelido' o minelivoo. Mo mulumo gono goloso gehepeve ngemeline' o noloseive. 18 A'mine neve nene mono' godolou' ti' li gizi nizado' nene vo do neive:

O'moso'mo evene' lisihe' lamine' do lu' izelesa nene
ge'nebe ogosa do lu' izaa' neine' nenako
O'moso mehe'ine imi lihimelo' monaa' ave nene
lukuvo nalizado' o neihe.
Mo keke' ngeli lukuvosi ma namilisave.
19 Nemu' nene O'moso'mi lulolo' evene' ma mulumo geni gihi nilizave engi' minevo' alevo'ine nene engi' do soto' o-ngidive ado' gamazi've lavo haza ma osa'mive ei' anau' miliki eito' lehete' i mini monovo lamineto' nene e'meti minilizado' o neive.